रेल्वेमा अनियमित रुपमा कर्मचारी भर्ना गरेको भन्दै ट्रेनमा आगजनी !

१३ माघ, जनकपुर।

रेल्वेमा अनियमित रुपमा कर्मचारी भर्ना गरेको भन्दै भारतको विहारमा प्रदर्शनकारीहरुले ट्रेनमा आगलागी गरेका छन् । रेल्वे भर्ती बोर्डको एनटीपीसी परीक्षामा धांधली गरेको भन्दै प्रदर्शनकारीहरुले आन्दोलनको तेस्रो दिन ट्रेनमा आगो लगाएका छन् ।

गयामा यार्डमा रुकेको प्यासेन्जर ट्रेनमा आगो लगाएका छन् भने गया स्टेशन परिसरमा चलेको ट्रेनहरुमा छात्रहरुले ढुँगामुढा गरेका थिए । यस अघि मंगलबार पटना, सीतामढी, मुजफ्फरपुर, आरा, बक्सरमा विवाद भएको थियो ।

सीतामढीमा तोडफोड एव ढुँगामुढा भएपछि प्रहरीले हवाई फायर गरेर भिडलाई तितर बितर गरेका थिए ।

जनमत पार्टीका कार्यकर्तामाथि कारवाही गर्न निर्देशन
मधेश प्रदेशको राजधानी जनकपुरधाम आउनुभएका जनप्रतिनिधिको सवारी साधनमा तोडफोड गर्ने जनमत पार्टीका कार्यकर्तामाथि कारवाही गर्न प्रदेश सरकारले निर्देशन दिएको छ ।

मधेश प्रदेश सरकारका प्रवक्ता तथा अर्थमन्त्री शैलेन्द्रप्रशाद साहले बुधबार बेलुकी प्रेस विज्ञप्ती जारी गरी राष्ट्रियसभा निर्वाचनका लागि मतदान गर्न जनकपुरधाम आउनुुभएका जनप्रतिनिधिका सवारी साधनमा गरिएको तोडफोड एवं हिंसाजन्य गतिविधिप्रति प्रदेश सरकारको गम्भीर ध्यानाकर्षण भएको बताउनुभएको छ ।

पूर्व घोषित विरोधका कार्यक्रम नरहेको अवस्थामा पनि जनमत पार्टीका कार्यकर्ताले प्रदेशसभा सदस्य अशोक यादव, हरिवन नगरपालिकाका प्रमुख, उपप्रमुख, जलेश्वर अस्पतालका मेसु डा सतिश साहलगायतका सवारी साधन तोडफोड गर्नाका साथै सांघातिक आक्रमण गरेको घटनाको वास्तविक छानविन गरी सम्बन्धित जनप्रतिनिधि एवम् चिकित्सकलाई क्षतिपूर्ति उपलब्ध गराउन एवं दोषी उपर कारवाही गर्न तालुक निकायलाई निर्देशित गरिएको विज्ञप्तीमा उल्लेख छ ।

घाइतेको शिघ्र स्वास्थ्यलाभको कामना गर्दै लोकतान्त्रिक मूल्य र मान्यतामा विश्वास राखी अहिंसात्मक तवरबाट आफ्नो विचार एवं अभिमत प्रकट गर्नसमेत जनमत पार्टीलगायत सम्बद्ध सबैमा उहाँले आग्रह गर्नुभएको छ ।

यसैबीच मधेश प्रदेशमा राष्ट्रियसभाको निर्वाचन बिथोल्न खोजेको आरोपमा जनकपुरधामबाट पक्राउ परेका जनमत पार्टीका सात कार्यकर्तामाथि प्रहरीले कानुनी कारवाही अघि बढाउने भएको छ । जनमतका कार्यकर्ताहरुले किसान आन्दोलनको नाउँमा बाँसको भाटासहित मतदान स्थलमा प्रवेश गर्न खोज्दा प्रहरीसँग झडप भएको थियो ।