प्रचण्डको ज्वाईलाई मन्त्री बनाएपछि माओवादीमा असन्तुष्टि

हाम्रो सन्देश संवाददाता

३० पुस, काठमाडौं ।

प्रदेश १ मा नेकपा माओवादी केन्द्रबाट पार्टी अध्यक्ष पुष्पकमल दाहाल ‘प्रचण्ड’को ज्वाई जीवन आचार्यलाई मन्त्री बनाएपछि पार्टीभित्रै असन्तुष्टि बढेको छ ।

आयार्चलाई मन्त्री बनाएकोप्रति ‘सहिद तथा बेपत्ता योद्धा सन्तति फाउण्डेसन’ गम्भीर आपत्ति जनाएको छ । सोमबार मुख्यमन्त्री हिम्कत कार्कीसँग आचार्य पनि विना विभागीय मन्त्री नियुक्त भएका थिए । उनलाई मन्त्रालय तोक्न बाँकी छ ।

उनलाई मन्त्री नियुक्त गर्दा जनभावना र अहिलेको वस्तुगत आवश्यकतालाई विशेष ख्याल गर्नुपर्ने जातीय, क्षेत्रीय, वर्गीय तथा योगदान एवम् लाल र निपूण, सबै हिसावले आचार्यभन्दा धेरै योग्य अन्य सांसदलाई पाखा लगाइएको आरोप छ ।

फाउण्डेसनका महासचिव अटल आचार्यले शुक्रबार एक विज्ञप्ति जारी गर्दै भनेका छन्, ‘यो माओवादी संस्कृति हैन । औपचारिक तर्क गरेर यसको दोष अरू कसैलाई दिन सकिएला तर त्यसो गर्नु सर्वथा गलत हुन्छ, औपचारिकता र अमूर्तताको बहसले सुद्धिकरण र रुपान्तरण सम्भव छैन । व्यवहारतः यसको सम्पूर्ण जिम्मेवारी कमरेड प्रचण्डलाई जान्छ र उहाँले नै लिनुपर्छ ।’

माओवादी आन्दोलनमा नेतृत्वको योगदान उल्लेख्य रहेपनि आन्दोलन र परिवर्तनको लागि हजारौं सपूतहरूको बलिदान र लाखौंको समर्पण विना नेतृत्वको योगदान सम्भव नभएको उल्लेख गरेका छन् ।

‘इतिहास बदल्न बलिदान दिने तिनै सपूतहरुका सन्तती हुनुको नाताले यो फाउण्डेशन र यसका सदस्यहरुले पनि आवश्यक पर्दा इतिहाँसको रक्षार्थ बगेको रगत जस्तै प्रष्ट देखिने र छुइने भाषामा बोल्नुपर्छ’ विज्ञप्तिमा भनिएको छ, ‘यस्तै हुने हो भने हामीले भन्नै पर्ने हुन्छ- लोभी आँखाहरुबाट त्यागी इतिहासको रक्षा हुन सक्दैन । तर त्यसो भन्नु अघि हामी कमरेड प्रचण्डलाई आग्रह गर्न चाहन्छौं- उक्त निर्णय शिघ्रतापूर्वक सच्याउन लगाईयोस् ।’

पार्टी अध्यक्ष प्रचण्डले बारम्बार भन्ने गरेको पार्टी निर्माण र सुद्धिकरण अहिलेको मुख्य आवश्यकता भन्ने कुरालाई समेत स्मरण गराएका छन् । पुराना नेतालाई पाखा लगाएर प्रचण्डको ज्वाईलाई मन्त्री बनाएपछि पार्टीभित्रैबाट आलोचना भइरहेको छ ।