बाबु प्रतिनिधिसभा सांसद, छोरा गाउँपालिका प्रमुख !

हाम्रो सन्देश संवाददाता

२१ मंसिर, काठमाडौं ।

बाबु प्रतिनिधिसभा सांसद छोरा गाउँपालिका प्रमुख । यो हो, यसपटकको प्रतिनिधिसभा निर्वाचनमा सबैभन्दा पछाडी निर्वाचित भएका दोलखाका गंगा कार्की र गौरीशंकर गाउँपालिकाका गाउँपालिका प्रमुख विश्वास कार्कीबीचको नाता अनि पदीय दायित्व ।

दोलखाबाट सोमबार बिहान मात्रै प्रतिनिधिसभाका लागि निर्वाचित ५७ वर्षीय गंगा कार्कीले जित हात पारेसँगै गत मंसिर ४ गते सम्पन्न निर्वाचनको प्रतिनिधिसभाको अन्तिम नतिजा सार्वजनिक भएको छ । उनको जितसँगै माओवादी केन्द्रले प्रत्यक्ष तर्फ प्रतिनिधिसभामा १८ वटा सिट हात पारेको छ ।

नेकपा एमालेका उम्मेदवारसँगको रोचक प्रतिस्पर्धामा कार्कीले ३१७ मतले बाजी मारेका हुन् । यसपटक गंगाले पनि नेकपा एमालेका उम्मेदवार बालकृष्ण शिवाकोटीलाई पराजित गरे । गंगाले ३६ हजार ७ सय ९९ मत ल्याउँदा नेकपा एमालेका उम्मेदवार शिवाकोटीले ३६ हजार ४ सय ८२ मत ल्याए ।

दोलखाको उत्तरी गाउँपालिका गौरीशंकर गाउँपालिका वडा नं. २, फाल्टुक स्थायी घर भएका कार्की परिवारका दुई मुख्य सदस्यमध्ये बाबुले जिल्ला हाँक्ने जिम्मा पाएका छन् छोरा विश्वासले करिब ७ महिनादेखि गाउँपालिका हाँकेका छन् ।

गत वैशाख ३१ मा सम्पन्न स्थानीय तह निर्वाचनमा ३१ वर्षीय विश्वासले ४ हजार ७ सय ५१ मत ल्याउँदै गाउँपालिका प्रमुखमा जित हात पारे । उनले नेकपा एमालेका उम्मेदवार जंगबहादुर गुरुङलाई पराजित गरेका थिए । त्यतिबेला कार्कीले जंगबहादुरलाई करिब हजार मतान्तरले पराजित गरेका थिए । गंगा कार्कीका दुई भाई छोरामध्ये विश्वास जेठा छोरा हुन् ।

पाँचपोखरीमा होमस्टे तथा होटल व्यवस्थापन तालिम
पर्यटकीय क्षेत्र पाँचपोखरी थाङ्पाल गाउँपालिका–४ थाङ्पालकोटका स्थानीय तथा व्यवसायीलाई घरबास (होमस्टे) सञ्चालन तालिम प्रदान गरिएको छ ।

पाँचपोखरी थाङ्पाल गाउँपालिकाको आयोजना, ग्रामीण समाज कल्याण सङ्घ आर्सो नेपाल, टिजिएच नेपालको सहयोग तथा थाङ्पाल उपत्यका एकीकृत पुनःलाभ कार्यक्रमको समन्वयमा होटल व्यवस्थापन र अतिथि सत्कार तथा करेसाबारी व्यवस्थापन तालिम समेत प्रदान गरिएको छ ।

आर्सो नेपालका परियोजना संयोजक हर्क तामाङले तालिमबाट होमस्टे व्यवस्थापनमा सुधार हुने र सञ्चालकहरूको क्षमतामा समेत वृद्धि हुने जानकारी दिनुभयो । तालिमबाट गाउँपालिकाको पर्यटन प्रवद्र्धनमा समेत सहयोग मिल्ने विश्वास लिइएको छ ।

यही मङ्सिर १९ गते सोमबारबाट सञ्चालन गरिएको तालिममा ४० सहभागी छन् । तालिमको उद्घाटन गर्दै गाउँपालिकाका उपप्रमुख सुनिता अधिकारीले पर्यटकलाई राम्रो सत्कार गर्न सके पाँचपोखरी पर्यटनका माध्यमबाटै समृद्ध हुने बताउनुभयो ।

गाउँपालिकाका प्रमुख प्रशासकीय अधिकृत लक्ष्मण कुइँकेल, पूर्वाधार विकास समितिका संयोजक एवं वडा नं ३ का अध्यक्ष ङिमाछिरिङ तामाङ, वडा नं ४ का अध्यक्ष कुलबहादुर बस्नेत, गाउँपालिकाका प्रशासन प्रमुख रामप्रसाद न्यौपाने, थाङ्पाल उपत्यका एकीकृत पुनःलाभ कार्यक्रमका संयोजक तामाङलगायतले पाँचपोखरीको पर्यटन उकास्न होटल र होमस्टेको महत्वपूर्ण भूमिका रहने बताउनुभयो । तालिमका सहभागी दोकदोक तामाङले यस कार्यक्रमले थप सिकाइ र आत्मविश्वास बढ्ने बताउनुभयो ।

तालिमको आगन्तुक रिसोर्ट प्रालिका व्यवस्थापक विमल पौड्याल, होटल यात्री ठमेलका एसिस्टेन्ट चिफ मोहनकुमार बस्नेतलगायतले सहजीकरण गरिरहनुभएको छ । पर्यटकलाई राम्रो आतिथ्यता प्रदान गरेमा आन्तरिक तथा बाह्य पर्यटकको वृद्धि भई गाउँपालिकाको आयस्रोत बढ्ने विश्वास लिइएको गाउँपालिकाका संस्कृति पर्यटन प्रवद्र्धन समितिका सचिव मुकुन्द पाण्डेले जानकारी दिनुभयो ।