स्वास्थ्य लाभपछि ‘मेरी बास्सै’ सुटिङमा फर्किइन् पल्पसा डंगोल

हाम्रो सन्देश संवाददाता

काठमाडौं ।

स्वास्थ्य लाभपछि अभिनेत्री पल्पसा डंगोल ‘चम्सुरी’ काममा फर्किएकी छिन् । झन्डै ६ महीनापछि उनी हाँस्य टिभी सिरियल ‘मेरी बास्सै’को छायांकन सेटमा फर्किएकी हुन् ।

यो हाँस्यसिरियलको नयाँ एपिसोडमा चम्सुरीलाई पनि देख्न पाइने भएको छ । अभिनेत्री डंगोलले नयाँ जोश र खुशिसाथ सुटिङ सेटमा फर्किएको बताइन् ।

चम्सुरी सेटमा फर्किँदा कास्ट एन्ड क्रिउले स्वागत गरेका थिए । तर, उनले मिर्गौला प्रत्यारोपण गर्न भने बाँकी नै छ । त्यतिञ्जेलसम्म उनले सिरियलमै काम गर्ने भएकी छिन् ।

उनले आफू सुटिङ सेटमा फर्कन लागेको जानकारी दिँदै फेसबुकमा लेखेकी छिन्, ‘आज बेलुका मेरीबास्सै हेर्नुहोला । म हजुरहरुलाई भेट्न आउँदैछु ।’

परिवारकै एकजना सदस्यले उनलाई मिर्गौला दिनेछन् भने यसका लागि सरकारी प्रक्रिया पनि पुरा हुँदैछ । माघमा मिर्गौला प्रत्यारोपण हुने जानकारी उनको परिवारका एक सदस्यले दिए ।

गत जेठमा लकडाउनकै समयमा उनलाई अस्पताल भर्ना गरिएको थियो । डाक्टरको सुझावअनुसार उनले दुबै मिर्गौला फेर्नुपर्ने हुन्छ ।