काठमाडाैंकाे सिडिओ सरूवा : ओलीको मान्छे फालियो, देउवाको मान्छे तानियो

हाम्रो सन्देश संवाददाता

काठमाडौं, २२ भदौं ।

काठमाडौंका प्रमुख जिल्ला अधिकारी कालीप्रसाद पराजुलीको सरुवा भएको छ । गृहमन्त्रालयले मंगलबार प्रजिअ पराजुलीलाई हटाएर उनको ठाउँमा सहसचिव गोविन्द प्रसाद रिजाललाई प्रजिअको जिम्मा दिएको हो।

प्रजिअ पराजुलीलाई मन्त्रालयमा सरुवा गरिएको हो । पराजुली पूर्व प्रधानमन्त्री केपी शर्मा ओली निकट मानिन्थे । पराजुलीलाई गृह मन्त्रालयको प्रशासन महाशाखामा सरुवा गरिएको गृह मन्त्रालयका एक उच्च अधिकारीले बताए ।पराजुलीसँग बालुवाटार र गृहमन्त्रालय रुष्ट थियो।

त्यस्तै रिजाल सल्यान, कैलाली, रौतहट, दाङ, मकवानपुरलगायत देशका ठूला तथा महत्वपूर्ण जिल्लाको कमाण्ड सम्हाली सकेका गृह प्रशासनका अनुभवी तथा अब्बल प्रशासकका रुपमा चिनिन्छन्। रिजाल सबैभन्दा लामो समय कैलालीमा करिब २३ महिना र दाङमा २२ महिना भन्दा बढी समय सिडिओ भएका थिए।

एमसीसी पारित गर्न ढिला गर्नुहुँदैन : डा.बाबुराम भट्टराई

जनता समाजवादी पार्टीका संघीय परिषद् अध्यक्ष डा. बाबुराम भट्टराईले अमेरिकी सहयोग निकाय मिलेनियम च्यालेन्ज कर्पोरेसन (एमसीसी) पारित गर्नुपर्ने बताएका छन्। उनले आइतबार मध्यराति ट्वीट गर्दै नेपाल र अमेरिका सरकारबीच चिठी आदानप्रदानसहित एमसीसी कार्यान्वयन गर्नुपर्ने धारणा राखेका हुन्।

भट्टराईले तत्काल तीनवटा विषयमा राष्ट्रिय सहमति गर्नुपर्ने धारणा राखेका छन्। उनले भारतलाई असल छिमेकी बनाउनुपर्ने, चीनसँग बेल्ट एन्ड रोड इनिसियटिभ (बीआरआई) र अमेरिकाको एमसीसी कार्यान्वयनमा जोड दिनुपर्ने धारणा राखेका छन्।

‘उच्चस्तरीय राजनीतिक/कुटनीतिक वार्तामार्फत भारतसँगका सबै विवाद हल गरी असल छिमेकी बनौं । चीनसँगका बीआरआई, पारवहन लगायत सम्झौता कार्यान्वयन गरौं ।’ पूर्वप्रधानमन्त्री भट्टराईले भनेका छन्, ‘अमेरिकासँग चिठी आदानप्रदानसहित एमसीसी कार्यान्वयन गरौं।’

एमसीसीको विषयमा पक्ष र विपक्षमा बहस भइरहेका बेला भट्टराईले आफ्नो धारणा राखेका हुन्। उनले युवा देशमा बसे र समृद्धि भए नै राष्ट्रियता बच्ने स्पष्ट पारेका छन्। उनले देशको आन्तरिक दलीय राजनीतिलाई वैदेशिक कुटनीतिसँग छासमिस गर्दा खतरनाक प्रतिगमनको नयाँ भेरिएन्ट जन्मन सक्ने बताएका छन्। भट्टराईले देशभित्र स्वस्थ राजनीतिक प्रतिस्पर्धा गरौं तर विदेश नीतिमा राष्ट्रिय सहमति कायम गर्नुपर्ने बताएका छन्।