अब दोहोरी साँझ र नाइट क्लव पनि सञ्चालन

हाम्रो सन्देश संवाददाता

काठमाडौं, १८ भाद्र ।

कोरोना संक्रमणको जोखिम कायमै रहेको भन्दै निषेधाज्ञा जारी गरिएको काठमाडौंमा अब दोहारी साँझ र नाइट क्लवहरु प्नि सञ्चालन हुने भएका छन् ।

जिल्ला प्रशासन कार्यालय काठमाडौंले दोहोरी साँझ, नाइट क्लब लगायतका रात्रीकालिन ब्यवसायका साथै लामो समयदेखि बन्द गरिएको सिनेमा हल सञ्चालन गर्न अनुमति दिएको छ ।

शुक्रबार जिल्ला प्रशासन कार्यालयमा बसेको व्यवसायी र डीसीसीएमसीको बैठकले राती १२ बजेसम्म दोहोरी साँझ चल्न दिने निर्णय गरेको हो ।
सरोकारवालाहरुसँगको छलफलमा जिल्ला प्रशासन कार्यालय काठमाडौंका प्रमुख जिल्ला अधिकारी कालीप्रसाद पराजुलीले रात्रीकालिन ब्यवसाय सञ्चालन गर्न अनुमति प्रदान गरेका हुन् ।

ऋब दोहोरी साँझ राती १२ बजेसम्म र क्लबहरु राती २ बजेसम्म चल्न पाउने प्रजिअ पराजुलीले बताए ।

सहायक प्रमुख जिल्ला अधिकारीको संयोजकत्वमा गठन हुने अनुगमन समितिले दोहोरी साँझ र रात्री क्लबको नियमित अनुगमन गर्ने जनाइएको छ ।

त्यस्तै, ५० प्रतिशत दर्शक कम गरेर सिनेमा हल पनि सञ्चालन गर्न प्रशासनले अनुमति दिएको छ । हलमा कर्मचारीदेखि दर्शकलाई समेत स्वास्थ्य मापदण्ड पूरा गरेर सञ्चालन गर्न छुट दिइएको छ ।

सञ्चालन गर्न दिइएका सबै क्षेत्रले स्वास्थ्य मापदण्ड अनिवार्य पालना गर्नुपर्ने प्रजिअ पराजुलीले बताए ।
गत वैशाख १६ गतेदेखि सिनेमा हलहरु बन्द भएका थिए ।

काठमाडौं उपत्यकाभित्र भिडभाड, सभा जुलुस, जात्रा महोत्सव गर्न भने नपाइने प्रशासनले जनाएको छ । प्रशासनको आदेश विपरित काठमाडौंमा राजनीतिक तहका सभा जुलुसहरु भने भइरहेका छन् ।