मन्त्रालयको गाडीभित्र यौनजन्य क्रियाकलाप, एक युवतीसहित तीन जना पक्राउ

हाम्रो सन्देश संवाददाता

काठमाडौँ, २४ असार ।

महिला बालबालिका तथा ज्येष्ठ नागरिक मन्त्रालयको गाडीभित्र यौनजन्य क्रियाकलाप गरिरहेको अवस्थामा तीन जना पक्राउ परेका छन्।

प्रहरी स्रोतका अनुसार बुधबार राति ११ बजे सूर्यविनायक नगरपालिका-७ घ्याम्पेडाँडाको जङ्गलमा रोकिराखेको गाडीबाट दुई पुरुष र एक युवतीलाई रंगेहात पक्राउ गरिएकाे हाे।

गस्ती गएको प्रहरीले प्रदेश ३-०१-००२ झ ५०५२ नम्बरको गाडीबाट निर्वस्त्र अवस्थामा उनीहरुलाई पक्राउ गरेकाे स्रोतले बतायो।

पक्राउ पर्नेहरुमा सिन्धुपाल्चोक पाङ्ग्रेटार घरभई भक्तपुर बस्ने ४१ वर्षीय गाडी चालक, सुनकोशी गाउँपालिका-६ का ३८ वर्षीय उनका नातेदार र दोलखाकी २१ वर्षीय युवती छन्।

प्रहरीले चालक र युवतीलाई बुधबार राति नै पक्राउ गरेको हाे। चालकका नातेदार प्रहरी देख्ने बित्तिकै फरार भएका थिए। उनलाई बिहीबार नियन्त्रणमा लिइएकाे प्रहरीले जनाएकाे छ।