सर्वोच्चद्धारा शेरबहादुर देउवालाई प्रधानमन्त्री बनाउन अस्वीकार

काठमाडौं, २६ जेठ ।

सर्वोच्च अदालतले नेपाली कांग्रेसका शेरबहादुर देउवालाई प्रधानमन्त्री बनाउन अस्वीकार गरेको छ । प्रतिनिधिसभा विघटन बदर र कांग्रेस सभापति शेरवहादुर देउवालाई प्रधानमन्त्रीको सपथग्रहण गराउन परमादेश तथा अन्तरिम आदेश माग गर्दै परेको रिटमाथि प्रारम्भिक सुनुवाइपछि सर्वोच्चले अन्तरिम आदेश दिन अस्वीकार गरेको हो ।

रिटमाथि प्रारम्भिक सुनुवाइपछि सर्वोच्चको संवैधानिक इजलासले निवेदकको माग बमोजिम अन्तरिम आदेश दिन अश्वीकार गरेको हो । अब रिटमाथि असार ९ गतेदेखि निरन्तर सुनुवाइ हुने भएको छ । सर्वोच्चले संसद विघटन गर्नुको कारण पनि माग गरेको छ ।

‘प्रधानमन्त्री ओली पदमुक्त, देउवालाई प्रधानमन्त्रीको सपथ खुवाउनु पर्छ’

प्रतिनिधि सभा विघटनविरुद्ध र संविधानको धारा ७६(५)अनुसार सरकार गठन सन्दर्भमा परेका रिटमाथि संवैधानिक इजलासमा सुनुवाइ सुरु भएको छ ।

संवैधानिक इजलास गठन सम्बन्धमा प्रश्न उठाइएपछि सुरु नभएको सुनुवाइ बुधबारबाट प्रारम्भ भएको हो । बुधबार प्रतिनिधिसभा विघटनविरुद्धको रिट निवेदक शेरबहादुर देउवा पक्षकाबाट बहस भएको छ ।

बहसमा भाग लिँदै वरिष्ठ अधिवक्ता शम्भु थापाले केपी शर्मा ओली प्रधानमन्त्रीबाट पदमुक्त भएको र शेरबहादुर देउवालाई प्रधानमन्त्रीको सपथ खुवाउनका लागि अन्तरिम आदेश जारी गर्न माग गरेका छन् ।

‘३० दिनभित्र विश्वासको मत लिनुपर्ने संविधानमा छ । विश्वासको मत पाउन सक्दिन भनिसकेकोले केपी ओलीजी पदमुक्त भइसक्नुभयो’, थापाले भने ।

संविधानको धारा ७६ (४) बमोजिम विश्वासको मत नलिएपछि प्रधानमन्त्रीबाट केपी शर्मा ओली स्वतः पदमुक्त भएको जिकिर गरेका उनले देउवालाई प्रधानमन्त्रीको सपथ खुवाउन बाटो खुला गर्न अन्तरिम आदेश जारी गर्न माग गरेका हुन् ।