अमेरिकाको न्युयोर्कबाट हराएका नेपाली विद्यार्थी २२ बर्षीय साहको शव भेटिएपछि अन्त्येष्टी

हाम्रो सन्देश संवाददाता

काठमाडौँ ।

जनवरीको तेश्रो साता न्युयोर्कबाट हराएका नेपाली विद्यार्थी २२ बर्षीय अजय साहको शव भेटिएपछि आज परिवारको उपस्थीतिमा अन्त्येष्टी गरिएको छ । न्युजर्सीको समरसेट मेमोरियल पार्क मिमेट्रीमा अजयको अन्त्येष्टी गरिएको अन्तिम विदाईमा सहभागी अमित शाहले जानकारी दिए । अन्त्येष्टीमा अजयका बुबा महेन्द्र साह रौनियार र आमा ममतादेवी साह रौनियारको समेत उपस्थीति रहेको थियो । दुईदिन अगाडिमात्र अजयका बुबाआमा न्युयोर्क आइपुगेका थिए ।

जनवरी २० को विहान झण्डै ५ बजे अन्तिमपटक ब्रुकलिन ब्रिजमा देखिएका अजयको शव हडसन रिभर र इष्ट रिभरको मिश्रण भएको बु्रकलिन ब्रिज नजिकैको पानीमा एंकरेज च्यानलमा भेटिएको थियो । उनको शव मार्च ९ मा नै फेला परेपनि पहिचान खुल्न नसकेकाले न्युयोर्क प्रहरीले अप्रिल २५ मा यसबारे मोरिस काउन्टीको प्रहरीलाई जानकारी दिएको थियो । अजयको झोला सी ब्राइटमा भेटिएको थियो । समुन्द्रको किनारमा जाँदा एकजना व्यक्तिले झोला भेटाएपछि अप्रिलको अन्तिम साता अधिकारीहरुलाई बुझाएका थिए ।

त्यस क्षेत्रको सीसीटिभी फूटेज हेर्दा उनी ब्रिजमा ब्याकप्याकसहित एक्लै हिडेको देखिएको थियो । जनवरी १९ को राती १२ बजेतिर न्युजर्सीबाट न्युयोर्कको पेन स्टेशनमा आएको र न्युयोर्कको पेन स्टेशनबाट बाहिर सीसीटिभी फुटेजमा देखिएको थियो ।पेन स्टेशनबाट बाहिर निस्केपछि अजय ब्रोडवे र बार्कलेमा देखिएका देखिएका थिए । न्युजर्सीको म्याडिसनमा रहेको ड्रिउ युनिभर्सिटीमा अध्ययनरत शाह म्याडिसनमै बस्दै आएका थिए ।

अजयको कोठामा गएर हेर्दा टेबुलमा आई लभ यु ममी लेखेको नोट भेटिएको थियो । तर उक्त नोटमा अरु केही नलेखिएको र रद्दीमा फ्याकिएको एउटा नोटमा उनले अब केही गर्ने बेला भएको व्यहोरा लेखेको भेटिएको थियो । पुख्यौली घर सिराहा रहेको र हाल उनको परिवार कीर्तिपुरमा बस्दै आएको जनाइएको छ । अजयले विगत साढे २ बर्षदेखि ड्रिउ युनिभर्सिटीमा अध्ययन गर्दै आएका थिए । यो समाचार खसोखासबाट साभार गरिएको हो