डिआइजीले सांसद क्षेत्री लाई टिपेर फाल्नुको कारण यस्तो रैछ

हाम्रो सन्देश संवाददाता

बुटवल, २० बैशाख ।

लुम्बिनी प्रदेशका प्रदेश प्रमुखको कार्यालय परिसरमा प्रहरी र प्रदेश सभा सदस्यहरुबीच झडप भएपछि घाइते नेपाली कांग्रेसकी सचेतक निर्मला क्षेत्रीले प्रतिक्रिया दिएकी छिन् । मुख्यमन्त्री शंकर पोखरेललाई शपथ खुवाउन निस्केका प्रदेश प्रमुख धर्मनाथ यादवलाई बाटो छेक्दा क्षेत्रीलगायत अन्य सांसद घाइते भएका थिए ।

महिला प्रहरी पठाउनुस् भन्दा प्रहरीले नमानेको क्षेत्रीले बताएकी छन् । उनले न्यायको लागि कहाँ जानुपर्छ आफू जान तयार रहेको बताएकी छन् । ‘प्रदेश प्रमुख बाहिर जाने बेलामा महिला प्रहरी पठाउनुस भन्दाभन्दै डिआइजी आएर पहिले म माथि आक्रमण गर्न थाल्नु भयो त्यसपछि सबै प्रहरी आएर टिपेर फाल्नु भयो,’ कांग्रेस सचेतक क्षेत्रीले भनिन्, ‘यस्तो आक्रमण म माथि गरियो ।’

मुख्यमन्त्री पोखरेललाई शपथ खुवाउन भन्दै निस्कन लागेका प्रदेश प्रमुख धर्मनाथ यादवलाई प्रदेश सभा सदस्यहरुले घेरा हालेर छेकेपछि प्रहरीले बल प्रयोग गरेको थियो ।

अल्पमतमा परेका मुख्यमन्त्री शंकर पोखरेललाई शपथ नखुवाउन माग गर्दै एमाले बाहेक दलका सांसदहरु दिउँसैदेखि प्रदेश प्रमुखको कार्यालयमा धर्ना दिएका थिए ।

विवादकै बीच पोखरेलले पद तथा गोपनियताको शपथ लिएका छन् । प्रदेश प्रमुख धर्मनाथ यादवले धर्ना बसेका विपक्षी सांसदहरुको घेरो तोडेर मुख्यमन्त्रीको कार्यालय पुगेर सपथ गराएका थिए ।

आफूविरुद्ध अविश्वासको प्रस्ताव पेश हुने भएपछि आज बिहान मात्रै मुख्यमन्त्री पदबाट राजीनामा दिएका पोखरेल संविधानको धारा १६८ (१) बमोजिम पुन: मुख्यमन्त्री बनेका हुन् ।

[तपाईसँग वा तपाईको वरिपरी पनि कुनै प्रतिभा, रचना र विकृति विसङ्गतीका घटना छन् भने हामीलाई [email protected] मा ईमेल गर्नुहोस् अथवा ९८१३८८१३८८ मा सिधा सम्पर्क गर्नुहोस् हामी तपाईलाई उच्च प्राथमिकता दिनेछौँ । धन्यवाद ।।]