मलेसियाको ५ राज्यमा सिएमसिओ मे १७ तारिख सम्मको लागि लम्बियो

हाम्रो सन्देश संवाददाता

काठमाडौं १४ बैशाख ।

मलेसिया सरकारले कोरोना नियन्त्रणको लागि पाँच वटा राज्यमा लगाएको सिएमसिओ (शसर्त आवागमन अनुमति) मे १७ तारिखसम्मको लागि थपेको छ ।
मलेसियामा कोरोना संक्रमित नया बिरामिको संख्या दिनादिन बढ्न थालेपछि अति प्रभावित ५ वटा राज्यमा सिएमसिओ व्यवस्था लागु गरिएको हो । पाँच वटा राज्यमा क्वालालुम्पुर, जोहोरबारु, पेनाङ, सरावक र सेलाङगर रहेका छन् ।

सिएमसिओ लागेका राज्यबाट अर्को राज्यमा बिना अनुमति आवागमन निषेध गरिएको छ भने राज्य भित्रका जिल्लाहरुमा भने आवागमन गर्न अनुमति लिन नपर्ने मलेसियका बरिष्ठ मन्त्री दातुकसिरी इस्माइल सब्रि याकुबले जानकारी गराए ।

प्रधानमन्त्री सहित एमालेका ५० भन्दा बढी नेता कन्ट्याक्ट ट्रेसिङमा

प्रधानमन्त्री केपी शर्मा ओली कोरोना भाइरसको संक्रमितको सम्पर्क (कन्ट्याक्ट ट्रेसिङ)मा आउनुभएको छ । मंगलबार ऊर्जा मन्त्री टोपबहादुर रायमाझी र एमाले नेता विष्णु रिजाललाई कोरोना संक्रमण देखिएसँगै प्रधानमन्त्री ओली कन्ट्याक्ट ट्रेसिङमा पर्नुभएको हो ।

मंगलबार बिहान ऊर्जा मन्त्री रायमाझीलाई कोरोना संक्रमण भएको खबर सार्वजनिक भएको थियो भने नेता रिजालले साँझ आफूलाई संक्रमण भएको जानकारी दिनुभएको थियो । रायमाझी र रिजाल आइतबार बालुवाटारमा भएको नेकपा एमालेको १४औं महाधिवेशन आयोजक कमिटीको बैठकमा सहभागी भएका थिए । बैठकलाई प्रधानमन्त्रीले सम्बोधन गर्नुभएको थियो ।

बैठककै क्रममा रिजालले प्रधानमन्त्रीका प्रेस सल्लाहकारसहित अन्य ५ नेताहरूसँग विना मास्क तस्वीर खिचाउनुभएको थियो । तस्वीर आएपछि रिजालसहित अन्य नेताहरूको आलोचना भएको थियो । प्रेस सल्लाहकार भएकाले थापा प्रधानमन्त्रीको प्रत्यक्ष सम्पर्कमा रहनु स्वभाविक भएकाले प्रधानमन्त्री कन्ट्याक्ट ट्रेसिङमा पर्नुभएको हो ।

प्रधानमन्त्रीसँगै बालुवाटारको बैठकमा सहभागी ५० भन्दा बढी एमाले नेता पनि कन्ट्याक्ट ट्रेसिङमा परेका छन् । सरकारले २५ जनाभन्दा बढी जम्मा हुन नपाइने सूचना जारी गर्दा समेत प्रधानमन्त्री ओलीले भीड जम्मा गरिरहनुभएको थियो । सूचना पछि पनि प्रधानमन्त्री निवासमा १ सयभन्दा बढी मानिस जम्मा भएर बैठक भइरहेको थियो भने सैयौं मानिस जम्मा पारेर धरहराको उद्घाटन गरिएको थियो ।