कपिलबस्तुमा बस र ट्रक जुध्दा एक जनाको मृत्यु, २१ घाइते

कपिलबस्तु, ७ बैसाख ।

कपिलबस्तुमा बस र ट्रक एक आपसमा जुध्दा एक जनाको मृत्यु भएको छ । २१ जना घाइते भएका छन्। बुटवलबाट कृष्णनगर जाँदै गरेको लु१ख ५६८४ नम्बरको बस र विपरीत दिशाबाट आउँदै गरेको ना४ख ३०१२ नम्बरको ट्रक बुद्धभूमि नगरपालिका ९ मा ठोकिएका थिए।

दुर्घट्नामा बसका चालक वाणगंगा नगरपालिका–१ का २९ वर्षीय कृष्णबहादुर कुँवरको उपचारका क्रममा मृत्यु भएको जिल्ला प्रहरी कार्यालय कपिलस्तुका प्रवक्ता डिएसपी धर्मराज भण्डारीले जानकारी दिए।

ट्रकका चालकसहित २१ जना घाइते भएका हुन्। घाइते मध्ये पाँच जनाको अवस्था गम्भीर रहेको प्रहरीले जनाएको छ। उनीहरुलाई उपचारको लागि बुटवल ल्याइएको छ। सामान्य घाइतेको स्थानिय स्वास्थ्य संस्थामा उपचार भएको छ।

जन्मदिमै मदनकृष्णको परिवारलाई कोरोना

वरिष्ठ हास्य कलाकार मदनकृष्ण श्रेष्ठको सपरिवारमा कोरोना संक्रमण देखिएको छ ।

हिजाे परेको आफ्नो जन्मदिनमा शुभकामना व्यक्त गर्ने सबैलाई धन्यवाद व्यक्त गर्दै श्रेष्ठले आफू, छोरा,छोरी,बुहारी र नातिनीलाई कोरोना संक्रमण पुष्टि भएको जानकारी गराएका हुन् ।

सामाजिक सञ्जालमार्फत् श्रेष्ठले भनेका छन् ‘पाँचै जनालाई कोरोना पोजिटिभ देखिएको छ । भइसकेपछि सास्तीचाँहि हुने रहेछ । त्यसैले यो भाइरसलाई खेलाँची नगर्नुहोला । जति सकिन्छ कोरोनाबाट सतर्क रहनुहोला ।’

मह जोडीको रुपमा प्रख्यात अर्का कलाकार हरिवंश आचार्य र उनकी श्रीमतीलाई गत वर्ष कोरोना संक्रमण भएको थियो ।