अभिनेत्री शिल्पाका कारण प्रकाश सुवेदीका दुबै कार्यक्रम निलम्बन

हाम्रो सन्देश संवाददाता

काठमाडौं, ७ बैसाख ।

रंग पत्रकार प्रकाश सुवेदीले एपिवान टेलिभिजनमा चलाउँदै आएको दुई चर्चित कार्यक्रम ‘ग्ल्यामर गफ’ र ‘रजत पट’ अहिलेलाई निलम्बनमा परेको छ । एपिवान टेलिभिजनले अभिनेत्री शिल्पा पोखरेलको उजुरीको आधारमा कार्यक्रम अहिलेलाई स्थगित गरेको हो । अभिनेत्री शिल्पा पोखरेलले आफ्नो चरित्र हत्या भएको भन्दै कार्यक्रम विरुद्ध टेलिभिजनमा उजुरी दिएपछि टेलिभिजनले छानबिनका लागि अहिलेलाई दुबै कार्यक्रममा स्थगित गरेको एपिवान टेलिभिजनका निर्देशक सुरेश पौडेलले बताए ।

दुवै कार्यक्रम अब चल्दै नचल्ने गरेर बन्द गरिएको होइन । अहिले प्रसारमात्र स्थगित गरिएको हो’ निर्देशक पौडेलले भने ‘शिल्पाको उजुरीको आधारमा कार्यक्रम छानबिन भैरहेको छ । त्यसपछि मात्र चल्छ चल्दैन टुङ्गो लाग्नेछ ।’ कार्यक्रम अब प्रसारण नै हुँदैन भनेर अहिले भन्न नमिल्ने पौडेलको भनाई रहेको छ ।

कार्यक्रम सञ्चालन प्रकाश सुवेदीले कार्यक्रम निलम्बन भएको मिडियाबाट सुन्दा आफु पनि आश्चर्यमा परेको बताए । ‘मेरो कार्यक्रम निलम्बन भएको अहिले समाचार आइरहेको छ । हो, होइन केही थाहा छैन’ सुवेदीले भने ‘त्यस विषयमा आधिकारिक पत्र हात परेपछि भनौँला ।’ टेलिभिजनको पत्र हात परेपछि मात्र यो विषयलाई आफुले आधिकारिक मान्ने सुवेदीको भनाई रहेको छ ।

आफु अहिले पनि नयाँ कार्यक्रम बनाइरहेको बताएका सुवेदीले कार्यक्रममा आफुले कसैको चरित्र हत्या नगरेको दाबी समेत गरे । ‘मैले कार्यक्रममा प्रमाणसहित सबै बिषय प्रप्ट पारेको छु’ सुवेदीले थपे ‘चित्त नबुझे फेरि युट्युवमा हेर्दा हुन्छ ।

एपिवान टेलिभिजनले कार्यक्रम बन्द गरेपनि आफुलाई केही फरक नपर्ने सुवेदीले बताए । उनले अगाडि भने, ‘मलाई कार्यक्रमका लागि धेरैले बोलाएका छन् । म गलत छैन ।’ एक टेलिभिजनले कार्यक्रम बन्द गर्दैमा आफ्नो कार्यक्रम नरोकिने बताएका सुवेदीले कुनै टेलिभिजनले कार्यक्रम नदिए युट्युवमा भएपनि जारी राख्ने सुनाए ।

केही दिन अगाडि सुवेदीले आफ्नो कार्यक्रममा अभिनेत्री शिल्पाका पूर्व पति छविराज ओझाको अन्तरवार्ता प्रस्तुत गरेका थिए । उक्त अन्तवार्तामा आफ्नो थप चरित्र हत्या प्रयास गरेको भन्दै शिल्पा एपिवान टेलिभिजन पुगेकी थिइन् । यस अगाडि सुवेदीले शिल्पाको पहिलो पतिको विषयमा पनि समाचार बनाएका थिए ।

[तपाईसँग वा तपाईको वरिपरी पनि कुनै प्रतिभा, रचना र विकृति विसङ्गतीका घटना छन् भने हामीलाई [email protected] मा ईमेल गर्नुहोस् अथवा ९८१३८८१३८८ मा सिधा सम्पर्क गर्नुहोस् हामी तपाईलाई उच्च प्राथमिकता दिनेछौँ । धन्यवाद ।।]