दैनिक उपभोग्य वस्तुको मूल्य अकासियो, उपभोक्तालाई खर्च धान्नै गाह्रो

हाम्रो सन्देश संवाददाता

काठमाडौं, २६ चैत्र ।

दैनिक उपभोग्य वस्तुको मूल्य अकासिएको छ। अत्यधिक मूल्यवृद्धिका कारण उपभोक्ता खर्च धान्नै नसक्ने अवस्थामा पुगेका छन्। कोभिड-१९ महामारीका कारण आयस्रोत गुमेर कमजोर बनेको क्रयशक्तिबीच नेपालीको भान्छा अचाक्ली महँगिएको छ।

भटमास, सनफ्लावरको तेलसँगै चामल, केराउ, हरियो तरकारी, कुखुराको मासु, खाना पकाउने ग्यासको भाउ उच्च परिमाणमा बढेको छ। यस्तै, पेट्रोल र डिजेलको मूल्य पटक-पटक बढेको छ।

गत वर्ष चैतको तुलनामा यसपटक मुख्य गरी हरियो तरकारीको मूल्य निकै बढेको छ। कालिमाटी तरकारी तथा फलफूल विकास समितिका अनुसार काउली, घिरौंला, घिउसिमी, भान्टा, लौकालगायत हरियो तरकारीको मूल्य वृद्धि भएको छ। प्याज र आलु भने केही सस्तिएका छन्।

किसानले पर्याप्त परिमाणमा खेती नगरेकाले उत्पादनमा कमी आई हरियो तरकारीको मूल्य वृद्धि भएको नेपाल फलफूल तथा तरकारी व्यवसायी महासंघका अध्यक्ष खोमप्रसाद घिमिरेले बताए।

घिमिरेका अनुसार किसानले कोभिड-१९ को त्रास यथावतै रहेको भन्दै यो वर्ष तरकारी खेती कम परिमाणमा गरेका हुन्।

‘यसको प्रत्यक्ष प्रभाव बजार र उपभोक्ता मूल्यमा परेको छ। स्वदेशी उत्पादनमा कमी आउँदा केही प्रमुख तरकारीको मूल्य अस्वाभाविक रूपमा वृद्धि भएको हो’, घिमिरेले भने, ‘अहिले बजारमा भएका अधिकांश तरकारीमध्ये ५० प्रतिशत भारतबाट आयात गरिएको छ।’ यसबाहेक पेट्रोलियम पदार्थमा भइरहेको मूल्यवृद्धिले ढुवानी खर्च बढेका कारण प्रभाव परेको उनको भनाइ छ। आजको अन्नपूर्ण पोस्ट दैनिकमा खबर छ।

[तपाईसँग वा तपाईको वरिपरी पनि कुनै प्रतिभा, रचना र विकृति विसङ्गतीका घटना छन् भने हामीलाई [email protected] मा ईमेल गर्नुहोस् अथवा ९८१३८८१३८८ मा सिधा सम्पर्क गर्नुहोस् हामी तपाईलाई उच्च प्राथमिकता दिनेछौँ । धन्यवाद ।।]