यस्तो छ भोलिको संसद बैठकको कार्यसूची

हाम्रो सन्देश संवाददाता

काठमाडौं, २ चैत ।

संसद सचिवालयले भोलि (मंगलबार) बस्ने प्रतिनिधिसभा बैठकको सम्भावित कार्यक्रमको कार्यसूची सार्वजनिक गरेको छ ।

सभामुख अग्निप्रसाद सापकोटाको अध्यक्षतामा बसेको कार्यव्यवस्था परामर्श समितिको बैठकपछि सचिवालयले सम्भावित कार्यसूची सार्वजनिक गरेको हो ।

भोलि दिउँसो १ बजेका लागि बोलाइएकोे बैठकमा कार्यसूचीअनुसार सभामुखले प्रतिनिधिसभा नियमावली, २०७५ को नियम १० को उपनियम (१) बमोजिम बैठकको अध्यक्षता गर्ने सदस्यहरुको मनोनयन गर्नेछन् ।

बैठकको अध्यक्षता गर्ने सदस्यहरुको मनोनयन पछि संविधानसभा सदस्य दिनेशचन्द्र यादवको निधनमा शोक प्रस्ताव पारित गरी बैठक सकिने सचिवालयका महासचिव डा. भरतराज गौतमले जानकारी दिएका छन् ।

सरकारले संसदमा प्रस्तुत गर्न खोजेको संवैधानिक परिषद् सम्बन्धी सहित ७ वटा विधेयकका बारेमा आज बसेको बैठकमा पनि सहमति जुट्न नसकेपछि भोलिको बैठक शोक प्रस्ताव गरेर सकिने भएको हाे ।

प्रतिनिधि सभा विघटन बदर गरेसँगै १३ दिनभित्र अधिवेशनको बैठक राख्न सर्वोच्चले परमादेश जारी गरे अनुसार फागुन २३ गते संसदको सातौँ अधिवेशनको पहिलो बैठक बसेकाे थियाे । यसपछि २६ गते दोस्रो बैठक बसेको थियो ।

[तपाईसँग वा तपाईको वरिपरी पनि कुनै प्रतिभा, रचना र विकृति विसङ्गतीका घटना छन् भने हामीलाई [email protected] मा ईमेल गर्नुहोस् अथवा ९८१३८८१३८८ मा सिधा सम्पर्क गर्नुहोस् हामी तपाईलाई उच्च प्राथमिकता दिनेछौँ । धन्यवाद ।।]