प्रचण्ड-माधवलाई ठेगान लागाईदिने प्रधानमन्त्री ओलीको चेतावनी

हाम्रो सन्देश संवाददाता

काठमाडौँ ,२३ फागुन ।

प्रधानमन्त्री केपी शर्मा ओलीले आफ्नो सरकारले गरेको काम देख्न नसकेर आफ्नै पार्टीका केही नेता सरकार ढाल्न लागि परेको दावी गरेका छन्। शनिबार सुन्दरीजलमा मेलम्चीको पानी खस्ने कार्यक्रमको अवलोकनपछि आयोजित कार्यक्रमलाई सम्बोधन गर्दै उनले यस्तो बताएका हुन।

‘यो सरकारले उधुम गर्‍यो, यसलाई तुरुन्तै ढाल्नुपर्‍यो भनेर हाम्रै पार्टीका हौं भन्ने केही कांग्रेसकहाँ दुईटाले दाँया-बायाँ औलाको सहिछाप गरेर निवेदन दिन गएका छन्,’ उनले भने, ‘निवदेन हाल्न गएका छन् कांग्रेसकहाँ– लौन यो केपी ओलीले त उधुमै गर्नथाल्यो, हटाऊ यसलाई । यसलाई हटाउनका लागि कमसेकम तपाईंहरूले नेतृत्व लिइदिनुपर्‍यो ।’

उनले प्रचण्ड-माधव पक्षलाई प्रत्यक्षतिर १२३ सिट जितेको पार्टी भत्काएर २३ सिट सिट जितेको कांग्रेसलाई प्रधानमन्त्री दिन खोजेको पनि आरोप लगाए।
‘हाम्रो पार्टीले १ सय १६ सिट प्रत्यक्षमा जितेको छ,’ ओलीले भने, ‘प्रत्यक्ष ११६ सिट जितेको पार्टी भत्काउने, २३ सिट जितेको कांग्रेसलाई लौन प्रभु प्रधानमन्त्री लिइदिनुपर्‍यो भन्ने । यो जनताको आदेश हो ? जनताको इच्छा हो ? जनताले आदेश दिएको त्यसैगरि हो ?’

लोकतन्त्र र विधिका कुरा गरेर भ्रममा पार्नेलाई आफूले ठेगान लगाउने भन्दै उनले त्यतातिर चिन्ता नगर्न आग्रह गरे। ‘तिनीहरू लोकतन्त्रका, विधि पद्दतिका, प्रक्रियाका कुरा गर्छन्,’ ओलीको भनाइ छ, ‘झुटा र नक्कली कुरासँग भ्रममा नपर्न म साथीहरूलाई आग्रह गर्छु । त्यतापट्टी तपाईंहरु चिन्ता नगर्नुहोस्, हामी ठेगान लाइहाल्छौं । त्यता तपाईंहरु चिन्तै नगर्नुहोस, हामी नै ठेगान लगाउँछौं ।’ मुनामदनको भनाइ सम्झँदै ओलीले जनताको साथ भए आफूहरुले देशलाई अगाडि बढाउन सक्ने बताए।

[तपाईसँग वा तपाईको वरिपरी पनि कुनै प्रतिभा, रचना र विकृति विसङ्गतीका घटना छन् भने हामीलाई [email protected] मा ईमेल गर्नुहोस् अथवा ९८१३८८१३८८ मा सिधा सम्पर्क गर्नुहोस् हामी तपाईलाई उच्च प्राथमिकता दिनेछौँ । धन्यवाद ।।]