प्रधानमन्त्री ओलीद्वारा दाहाललाई चेतावनी : कानुनको पालना गर्नुस् हप्किदप्की होइन

काठमाडौं, २२ माघ ।

प्रधानमन्त्री केपी शर्मा ओलीले नेकपा प्रचण्ड-नेपाल पक्षका अध्यक्ष पुष्पकमल दाहाल प्रचण्डलाई कानुनको पालना गर्न चेतावनी दिएका छन् । बिहीबार आफूपक्षीय किसान भेलालाई सम्बोधन गर्दै प्रधानमन्त्री ओलीले यतिबेला प्रचण्ड-नेपाल नेपालहरु हप्किदप्कीमा लागेको भन्दै त्यसो गर्न छोडेर कानुनको पालना गर्नतिर लाग्न चेतावनी दिए ।

‘उहाँहरु आक्रामक ढंगले आउनुहुन्छ, नियम मान्दिनँ भन्नहुन्छ । प्रजिअ, एसपी डिएसीलाई हप्किदप्की गर्नुहुन्छ । कानुनको पालना गर्नुस् हप्किदप्की होइन’, ओलीले भने, ‘प्रचण्डलाई म सम्झाउछु ती दिन गए, जतिबेला हप्कीदप्की गर्नुहुन्थ्यो । लोकतन्त्र भनेको कानुनको पलाना गर्ने हो, बलमिच्चयाइको राज होइन । ती दिन गए जतिबेला तपाईं संविधान मान्दिनँ कानुन मान्दिनँ भनेर उपद्रव मच्चाएर हिँड्नुभएको थियो ।’

ओलीले प्रचण्ड-नेपालहरुलाई देश अगाडि बढ्ला कि भनेर चिन्ता लागेको बताए । ‘उहाँहरुले यो बन्द गर्नु नै हुन्थ्यो आज । गर्ने कोसिस गर्नुहुन्थ्यो बन्द त खासै भएन । जनतालाई अलिअलि दुख त दिनुभयो’, प्रधानमन्त्री ओलीको भनाइ छ । उनले केही गरिबको तरकारी फ्याकेर महान आन्दोलन सफल पार्न लागेको भन्दै ‘एउटी आमाले डोकोमा बोकेर ल्याएको तरकारी सडकमा फ्याकिदिनुभयो । आफु गाडि र बाइक चढेर रमिता हेरेको’ बताए ।

ओलीले प्रचण्ड नेपालका कार्यकर्ता सिध्दिएपछि आफै सडकमा आएको टिप्पणी समेत गरे । ‘कार्यकर्ता सिध्दिएछन् । सबै यता छन् अनि के हुनु ? हामी यहाँ छौँ भनेर सात दोवाटोमा आफै उत्रिनुभएछ’ओलीको भनाइ छ । सम्बोधनका क्रममा ओलीले प्रचण्ड–नेपाल नेपाल पक्ष कम्युनिस्टको बर्का ओढेर कम्युनिस्ट आन्दोलनलाई नै कमजोर पार्न लागि परेको आरोप पनि लगाए ।

‘आज कम्युनिस्ट आन्दोलनको सबैभन्दा ठुलो विरोधी भनेको कम्युनिस्टकै बर्को ओढेर बाटामा बस्नेहरु छन्’, प्रधानमन्त्री ओलीको भनाइ छ । उनले विगतमा पनि उनीहरुले दुःख दिएको बताए । ‘विगमतमा पनि कम्युनिस्ट आन्दोलन उनीहरुले बद्नाम गराए, कमजोर गराए । निर्मम निर्दयी र मानवता नभएको जस्तो प्रभाव दिनेगरी उपद्रव मच्चाए’, ओलीको भनाइ छ ।

उनले भूमिहीन किसानको समस्या समाधान गर्न आयोग गठन गर्दा माधव नेपालले मुद्दा हालेर किसानविरोधी काम गरेको आरोप लगाए । उनले कृषि क्षेत्रका समस्या समाधान गर्ने नेता को हो ? भनेर प्रश्न गर्दै सहभागीहरुलाई सोधेका थिए । जवाफमा ‘माधव नेपाल’ भन्ने जवाफ आएको थियो । पछिल्लो समय मन्त्री पद्मा अर्याललाई समेत नेता नेपालले हप्काउन खोजेको र खाली आफ्नै मान्छे राख्न प्रयास गरेपनि पछिल्लो पटक भत्काउन नसकेको बताए ।