कोरोनाविरुद्धको खोप अभियान आजबाट यसरी सुरू हुनेछ

हाम्रो सन्देश संवाददाता

काठमाडौं, १४ माघ ।

नेपालमा आजदेखि कोरोना भाइरसविरुद्धको खोप लगाउन सुरू हुँदै छ। आज बिहान १० बजेदेखि खोप अभियान शुभारम्भ गरिन लागेको हो ।

प्रधानमन्त्री केपी शर्मा ओलीले बालुवाटारबाट भर्चुअल रूपमा अभियान सुरू गर्ने र काठमाडौंका ११ अस्पतालबाट यो अभियान थालनी हुने स्वास्थ्य मन्त्रालयका प्रवक्ता डा.जागेश्वर गौतमले जानकारी दिए । पहिलो खोप लगाउने निर्णय गर्ने अधिकार हरेक अस्पताललाई दिइएको उनको भनाइ छ। ११ वटा अस्पताल प्रत्यक्ष जुम विधिबाट जोडिनेछन् र एकैपटक खोप लगाउन थालिनेछ।

प्रधानमन्त्रीले खोप अभियान सुरू गर्नुअघि राष्ट्रपति विद्यादेवी भण्डारीले पठाएको सन्देश पढ्नेछन्। अभियान शुभारम्भ भएलगत्तै देशभरका अस्पतालहरूबाट खोप लगाउन थालिने प्रवक्ता डा.गौतमले बताए।

पहिलो चरणमा चार लाख ३० हजार फ्रन्टलाइनरले खोप लगाउन पाउने स्वास्थ्य सेवा विभागले जनाएको छ। विभागको खोप महाशाखा प्रमुख डा.झलक शर्मा गौतमले काठमाडौंका ११ वटा अस्पतालबाट एकैसाथ खोप अभियान सुरू गरिने जानकारी दिए।

उनका अनुसार शुक्रराज ट्रपिकल तथा सरुवा रोग अस्पताल, वीर अस्पताल, आयुर्वेद अनुसन्धान तथा तालिम केन्द्र अस्पताल कीर्तिपुर, पाटन अस्पताल, परोपकार प्रसूति तथा स्त्री रोग अस्पताल, त्रिवि शिक्षण अस्पताल, भक्तपुर अस्पताल, शहीद धर्मभक्त अंग प्रत्यारोपण केन्द्र, काठमाडौं मेडिकल कलेज, सशस्त्र प्रहरी अस्पताल र शहीद गंगालाल अस्पतालबाट एकैसाथ खोप अभियान सुरू हुनेछ।

कसलाई पहिलो खोप लगाउने भन्ने अधिकार सम्बन्धित अस्पताललाई नै दिइएको डा.गौतमले बताए।

खोप अभियानमामा सात प्रदेश र काठमाडौं उपत्यकाका गरी ६२ वटा अस्पताल र ७७ जिल्लाका तीन सयभन्दा बढी केन्द्रबाट खोप अभियान सुरू हुनेछ।

खोप लगाउँदा समस्या देखिए राज्यले उपचार गर्ने

कोरोना भाइरसविरुद्धकको खोप लगाउँदा राज्यले नै उपचार गर्नेछ। त्यसका लागि विभिन्न अस्पतालमा उपचार व्यवस्था मिलाइएको मन्त्रालयका प्रवक्ता डा. गौतमले बताए।

तर खोप लगाउनका लागि भर्नुपर्ने कार्डमा भने खोप लगाएर केही भएको खण्डमा स्वयं नै जिम्मेवार हुनुपर्ने उल्लेख गरिएको छ। “नेपाल सरकारबाट कोभिड–१९ विरुद्धमा उपलब्ध भएको खोप मैले मेरो राजीखुशी लिएको छु र पछि कुनै भवितव्य परी केही भएमा कोही कसैलाई दोष नदिई म स्वयं जिम्मेवार हुनेछु,” खोप लिनेलाई विवरण भर्न दिइने खोप कार्डमा लेखिएको छ।

मन्त्रालयले भने कुनै समस्या देखिएको खण्डमा राज्यले नै उपचार गर्ने जनाएको छ। खोप ऐन, २०७२ मा समेत खोप लगाएपछि हुनसक्ने अनपेक्षित घटनाको तत्काल अनुसन्धान गर्न अनपेक्षित घटना अनुसन्धान समिति रहने व्यवस्था गरिएको छ।

खोप लिएको व्यक्तिको स्वास्थ्यमा गम्भीर असर परेको कुरा अनुसन्धान समितिले ठहर गरेमा सो खोप जुन निकाय वा संस्थाबाट दिइएको हो, सो निकाय वा संस्थाले उपचार गरी क्षतिपूर्तिसमेत दिनुपर्ने व्यवस्था छ। तर अहिलेको नेपालमा खोप उपलब्ध गराउने भारतीय कम्पनीले ‘कोभिशिल्ड’ले भने त्यसको जिम्मेवारी नलिने प्रष्ट पारेको छ।

पहिलो चरणमा फ्रन्टलाइनरलाई लगाउँदा उनीहरूमा कुनै असर देखियो भने सम्बन्धित अस्पतालमै उपचार गर्ने गरी व्यवस्था मिलाइएको प्रवक्ता गौतमको भनाइ छ।

तपाईको समाचार, लेख /रचना वा सुझाव र प्रतिक्रिया भएमा [email protected] मा पठाउनुहोला ।