प्रचण्ड-माधव समूहले ओलीलाई अध्यक्षबाट हटायो

हाम्रो सन्देश संवाददाता

काठमाडौं, ७ पुष ।

नेकपाको प्रचण्ड-माधव समूहको केन्द्रीय कमिटी बैठकले केपी शर्मा ओलीलाई अध्यक्षबाट हटाउने निर्णय अनुमोदन गरेको छ ।

स्थायी कमिटीले ओलीलाई कारबाही गर्न लिएको निर्णयलाई मंगलबार बसेको केन्द्रीय कमिटी बैठकले अनुमोदन गरेको हो । त्यस समूहको बैठकमा ३ सय १५ जना केन्द्रीय सदस्य उपस्थित रहेको दाबी गरिएको छ ।

नेकपाका अध्यक्ष पुष्पकमल दाहाल र वरिष्ठ नेता माधव नेपाल पक्षधर केन्द्रीय कमिटी सदस्यहरुको भेलाले प्रधानमन्त्री तथा नेकपा अध्यक्ष केपी शर्मा ओलीलाई अनुशासनको कारबाही गरी अध्यक्ष पदबाट हटएको छ। उनको ठाउँमा माधवकुमार नेपाललाई नियुक्त गरिएको छ।

बैठकमा ३१५ जना केन्द्रीय कमिटी सदस्यहरुको सहभागिता रहेको नेकपाका प्रवक्ता नारायणकाजी श्रेष्ठले जानकारी दिए। अब दाहाल र नेपाल पार्टी अध्यक्ष बनेका छन्।

बैठकले संसद विघटनको घोषणालाई असंवैधानिक, अलोकतान्त्रिक, निरंकुश र प्रतिगामी भन्दै त्यसलाई भर्त्सना र अस्वीकार गरेको छ।

बैठकले संसदको अधिवेशन आह्वान गर्न पनि माग गरेको छ।

संसद् विघटनबिरुद्ध संघर्ष गर्ने घोषणा पनि बैठकले गरेको छ।

‘ओलीलाई पार्टी अनुशासनको गम्भीर उल्लंघन गरेकाले पार्टी अध्यक्षको जिम्मेवारीबाट हटाइयो,’ बैठकपछि प्रवक्ता श्रेष्ठले भने।

बैठकले कृष्णबहादुर महरालाई स्थायी कमिटी सदस्यमा अनुमोदन गरेको छ।

सहिदहरुप्रति मौनधारण गरेर सुरु भएको बैठकले स्थायी कमिटीका कार्यसूचीलाई अनुमोदन गरेको छ।

बैठकमा अध्यक्ष पुष्पकमल दाहाल, माधवकुमार नेपाल र झलनाथ खनालले धारणाहरु बाँडेका थिए।

दाहालले पार्टी विचार र विधि हो भन्ने तथ्य स्पष्ट पार्दै यो बैठक नेकपाको आधिकारिक रहेको प्रस्ट पारे। ‘हामी एकीकृत पार्टीको वास्तविक प्रतिनिधित्व गर्दैछौँ। बालुवाटारको भेला पार्टी चोइट्याउन खोज्नेको भेला हो,’ दाहालले भने।

खनालले पार्टी आन्दोलन कमजोर पार्न खोज्ने सबैलाई परास्त पार्न आग्रह गरे।

त्यस्तै, नेपालले पूर्वपार्टी ब्युँत्याउने सपना नदेख्न चेतावनी दिए।

[तपाईसँग वा तपाईको वरिपरी पनि कुनै प्रतिभा, रचना र विकृति विसङ्गतीका घटना छन् भने हामीलाई [email protected] मा ईमेल गर्नुहोस् अथवा ९८१३८८१३८८ मा सिधा सम्पर्क गर्नुहोस् हामी तपाईलाई उच्च प्राथमिकता दिनेछौँ । धन्यवाद ।।]