ललितपुरसहित तीन जिल्लामा पहिलोपटक कोरोना संक्रमित, कहाँ कति थपिए (सुचीसहित)

हाम्रो सन्देश संवाददाता

काठमाडौं, ६ जेठ ।

आज थप जिल्लाहरुमा पहिलोपटक कोरोना भाइरसका संक्रमित भेटिएका छन् । २७ जना नयाँ थपिएकामध्ये तीन जिल्लामा पहिलोपटक संक्रमित भेटिएका हुन् ।

आज ललितपुर, रामेछाप र लमजुङमा पहिलोपटक कोरोना संक्रमित भेटिएका हुन् । योसहित ३६ जिल्लामा कोरोना भाइरसका संक्रमित भेटिएका छन् ।

आज संक्रमित मध्ये २४ पुरुष र ३ महिला रहेको स्वास्थ्य मन्त्रालयका प्रवक्ता डा. विकास देवकोटाले जानकारी दिएका छन् ।

आज कुन जिल्लामा कति थपिए

झापा ९ मोरङ १ सुनसरी १ सर्लाही २ काठमाडौं ३ भक्तपुर १ मकवानपुर १ रामेछाप १ ललितपुर १ सिन्धुली १ लमजुङ १ कविलवस्तु ४ नवलपरासी १

कोरोनाको नयाँ लक्षण : ‘झाडापखाला लाग्‍नु, स्वाद र गन्ध थाहा नपाउनु’

नेपालमा पछिल्लो समय कोरोना भाइरसको संक्रमण बढ्दै गएको छ । चिकित्सकहरूका अनुसार विनालक्षण देखिएको कोरोना संक्रमणले जोखिम बढाएको छ ।

“तपाईंमा कोरोनाको कुनै लक्षण देखिएको छ, अथवा ट्राभल हिस्ट्री छ भने मेरो शरीरमा पनि कोरोना भाइरस हुन सक्छ भन्ने बुझ्न जरुरी छ,” शुक्रराज ट्रपिकल तथा सरुवा रोग अस्पतालका निर्देशक डा. सागरराज भण्डारीले भने । कोरोना संक्रमण देखिएका ८० प्रतिशतमा विनालक्षण देखिएको उनले जनाए ।

“हामीले कोरोना भाइरस (कोभिड १९) को लक्षणमा श्वासप्रश्वासमा समस्या, खोकी लाग्ने, ज्वरो आउने भन्दै आएका छौं, तर कोरोनाका अन्य लक्षणसमेत देखिएको पाइएको छ,” उनले भने, “थकाइ महसुस हुने जिउ दुख्ने, टाउको दुख्ने, गन्ध थाहा नहुने र श्वास थाहा नपाउनेसमेत लक्षण हुने पाइन्छ ।”

कतिपयलाई कोरोनाका लक्षणमा झाडापखालासमेत भएको उनको भनाइ छ । उनले भने, “सुरुमा एकैपटक सबै लक्षण देखिँदैन बिस्तारै लक्षण बढ्दै जाने हुन् ।”

अहिले टेकु अस्पतालमा पाँच संक्रमित उपचाररत छन् । उपचारत केहीलाई खोकी देखिएको उनले जानकारी दिए । उनले भने, “कोरोना संक्रमण देखिएर उपचाररत सबै काठमाडौंबाहिरका र तर काठमाडौंमा बस्दै आएका छन् ।”

हाम्रो सन्देशमा प्रकाशित कुनैपनि लेख वा सामग्रीबारे गुनासो तथा सुझाव भए [email protected] मा पठाउनु सक्नुहुनेछ । हामीसँग तपाईं फेसबुक, ट्विटर र भाईबरमा पनि जोडिन सक्नुहुन्छ ।