प्रदेश नं. २ का प्रजिअको कडा आदेशः- ‘कोरोना अस्पतालबाट भागे गोली हान्नु’

हाम्रो सन्देश संवाददाता

काठमाडौं, २ जेठ ।

केही दिनअघि पर्सास्थित नारायणी अस्पतालबाट दुईजना कोरोना संक्रमित भागेपछि प्रशासनले अस्पतालबाट भाग्नेलाई गोली हान्नेसम्मको अधिकार दिएको छ । यसरी अस्पतालबाट भाग्नेलाई गोली हान्नेसम्मको अधिकार दिइएको यो पहिलो घटना हो ।

प्रमुख जिल्ला अधिकारी विष्णुकुमार कार्कीको अध्यक्षतामा बसेको संकट व्यवस्थापन समितिले यो निर्णय गरेको हो । सो बैठकले कोरोना संक्रमितहरु अस्पतालबाट भागेमा गोली हान्‍ने अधिकार सुरक्षाकर्मीलाई दिने निर्णय गरेको हो ।

बैठकको निर्णय नं. ३ मा भनिएको छ, ‘अब उप्रान्त भर्ना भएका संक्रमित भाग्न नदिन सुरक्षा निकायले उच्च सतर्कता अपनाउने र भाग्न खोज्ने व्यक्तिलाई नियन्त्रणमा लिन आवश्यकताअनुसार बल प्रयोग गर्ने र यसका लागि सुरक्षा निकायलाई गोलीसमेत चलाउन सक्ने अधिकारी प्रदान गर्ने ।’

गत बधुबार दुईजना कोरोना संक्रमित शौचालय जाने बहानामा अस्पतालबाट भागेका थिए । वीरगञ्‍ज निवासी दुवै संक्रमित भागेर घर पुगेका थिए । घरमा आफन्तले पनि गाली गरेपछि निषेधाज्ञा जारी गरेको अवस्थामा उनीहरुलाई सडकमा हिँडिरहेका बेला प्रहरीले नियन्त्रणमा लिएर पुनः अस्पतालमै ल्याएको थियो ।

पर्साका सहायक प्रमुख जिल्ला अधिकारी ललितबहादुर बस्‍नेतका अनुसार संक्रमित भागेमा नियन्त्रणमा लिन आवश्यकताअनुसार बोल प्रयोग गर्ने तथा गोलीसमेत चलाउन पाउने अधिकार सुरक्षाकर्मीलाई दिइएको छ ।

बैठकमा नारायणी अस्प्तालका डा। मदन उपाध्याय, पर्साका सहायक प्रमुख जिल्ला अधिकारी ललितकुमार बस्नेत, नेपाली सेनाको चण्डीप्रसाद गणका प्रमुख सेनानी मदनजंग राणा, नेपाल प्रहरीकी एसपी गंगा पन्त, सशस्त्र प्रहरीका एसपी दिवेन्द्र कुँवर, राष्ट्रिय अनुसन्धान विभागका उप–अनुसन्धान निर्देशक कुमार खड्का र वीरगञ्ज महानगरका मेयर विजयकुमार सरावगी उपस्थित थिए ।

हाम्रो सन्देशमा प्रकाशित कुनैपनि लेख वा सामग्रीबारे गुनासो तथा सुझाव भए [email protected] मा पठाउनु सक्नुहुनेछ । हामीसँग तपाईं फेसबुक, ट्विटर र भाईबरमा पनि जोडिन सक्नुहुन्छ ।