उद्योग धन्दा खोल्ने निर्णय फिर्ता लिँदै सरकार, भोलिदेखि निर्मम भएर लकडाउनमा कडाई

हाम्रो सन्देश संवाददाता

वैशाख,३० काठमाडौं ।

सरकारले उद्योग धन्दा खोल्न दिने निर्णय फिर्तां लिने भएको छ ।

कोरोना भाइरस (कोभिड–१९) संक्रमितको संख्या बढ्दै गएपछि सरकारले लकडाउनमा थप कडाई गर्ने भएको हो । एक मन्त्रीका अनुसार त्यसबारे भोलि (बुधबार) सम्म सरकारका तर्फबाट केही निर्णय आउने छ । ‘खुकुलो पार्दा महामारी अनियन्त्रित रुपमा बढ्ने खतरा देखियो’, उनले भने, ‘उद्योग खोल्न दिने निर्णय फिर्ता हुन्छ ।’

ती मन्त्रीका अनुसार प्रधानमन्त्री केपी ओली मंगलबारको बैठकमा कोरोना रोकथाम तथा नियन्त्रण उच्चस्तरीय समितिका संयोजक ईश्वर पोखरेल र सदस्य रहेका मन्त्रीहरुसँग रिसाएका थिए ।

‘तपाईंहरुले खुकुलो पारौं भन्नु भयो । यो भावनामा डुबेर निर्णय गर्ने बेला होइन’, प्रधानमन्त्रीको भनाइ उद्धृत गर्दै ती मन्त्रीले भने, ‘मान्छे नै रहेन भने आर्थिक गतिविधि खुला गरेर के हुन्छ ? पहिला मान्छे बाँच्नुपर्छ ।’

मन्त्रिपरिषदले शुक्रबारदेखि ४४ प्रकारका उद्योग खोल्न अनुमति दिएको थियो । यस्तै सरकारी कार्यालयहरुमा एक तिहाई कर्मचारीलाई हाजिर गराइएको छ । सोही कारण काठमाण्डु उपत्यकाका सडकमा लकडाउनमा समेत ट्राफिक जाम भइरहेको छ ।

हाम्रो सन्देशमा प्रकाशित कुनैपनि लेख वा सामग्रीबारे गुनासो तथा सुझाव भए [email protected] मा पठाउनु सक्नुहुनेछ । हामीसँग तपाईं फेसबुक, ट्विटर र भाईबरमा पनि जोडिन सक्नुहुन्छ ।