नेपालमा कोरोना भाइरसको प्रकोप छैन : मन्त्री भट्टराई

हाम्रो सन्देश संवाददाता

काठमाडौं,१८ माघ ।

सरकारले चीनमा फेला परेको नोभेल कोरोना भाइरस प्रकोपको नेपालमा कुनै किसिमको जोखिम नरहेको स्पष्ट पारेको छ । संस्कृति, पर्यटन तथा नागरिक उड्डयनमन्त्री योगेशकुमार भट्टराईले कोरोना भाइरस प्रकोपको नेपालमा उच्च जोखिम नरहेको तर उच्च सतर्कता अपनाउन सरकारले सबै संयन्त्रको प्रभावकारी परिचालन गरेको बताएका छन् ।

कोरोना भाइसरको सम्भावित प्रकोपको जोखिम नियन्त्रणका लागि के–कस्ता उपाय अपनाउने भन्ने सन्दर्भमा आज सरोकारवाला निकायसँगको छलफलका क्रममा उनले नेपालको पर्यटन क्षेत्र सुरक्षित रहेको र कोरोना भाइरसको जोखिम न्यूनीकरणका लागि सरकार संवेदनशील रहेको बताएका छन् । जोखिम नियन्त्रणका लागि त्रिभुवन अन्तरराष्ट्रिय विमानस्थल तथा चीनसँगका सीमानाकामा स्वास्थ्यकक्ष सञ्चालन गरिएको उहाँले जानकारी दिएका छन् ।

उनले भने, “नेपाल अहिले कोरोना भाइरसको उच्च जोखिम क्षेत्र होइन, तर पनि चीनसँग सम्पर्क जोडिएको हुनाले सतर्कताचाहिँ अपनाउनै पर्छ, त्यसैले उच्च जोखिममा छैन तर उच्च सतर्कता अपनाएका छौँ, अन्तरमन्त्रालयको समन्वयमा सबै संयन्त्रलाई प्रभावकारीरूपमा परिचालन गरिएको छ ।” कोरोना भाइसरको हल्ला चलेपछि सरकारले एक सातादेखि यसले पार्न सक्ने असरका सम्बन्धमा सरोकारवालासँग छलफल गरिरहेको छ ।

यही माघ १२ गते प्रधानमन्त्रीको उपस्थितिमा गृहमन्त्री, परराष्ट्रमन्त्री, स्वास्थ्य तथा जनसङ्ख्यामन्त्री, संस्कृति, पर्यटन तथा नागरिक उड्डयनमन्त्री र तत्सम्बन्धित मन्त्रालयका सचिव, विभाग र महाशाखाका प्रमुखको बैठकले चीनमा फैलिएको नोभेल कोरोना भाइरस र सोले नेपालमा पार्न सक्ने असरका सम्बन्धमा छलफल गरेको थियो ।

अहिले स्वास्थ्यमन्त्रीको अध्यक्षतामा अन्तरमन्त्रालयका प्रतिनिधि रहने उच्चस्तरीय समिति र स्वास्थ्य सचिवको अध्यक्षमा उपसमिति गठन गरिएको मन्त्रालयले जनाएको छ । पर्यटनसँग प्रत्यक्ष सम्बन्ध राख्ने जिम्मेवार पर्यटनमन्त्री भट्टराईले पनि आफ्नो सक्रियता बढाएका छन् । पर्यटन क्षेत्रमा कोरोना भाइरसको नकारात्मक प्रभाव नपरोस् र सही सूचना सम्प्रेषण होस् भन्ने सरकार एवं सरोकारवाला व्यवसायीको धारणा छ ।

पछिल्ला दिनमा सञ्चारमाध्यममा कोरोना भाइरसबारे नेपालका सन्दर्भमा आइरहेका विभिन्न समाग्रीले व्यवसायमा एक प्रकारका त्रास उत्पन्न गराएको भन्दै सम्बन्धित विषयमा संवेदनशील भएर सन्देश प्रकाशन प्रसारण गर्न पनि पर्यटनमन्त्रीले आम सञ्चारमाध्यमलाई अनुरोध गरेका छन् ।

उनले नेपालमा बेलाखबत यस्ता जोखिम र सङ्कट निम्तने गरेको र विसं २०७२ को गोरखा भूकम्पका बेला पनि सञ्चार संवेदनशीलताप्रति नेपाली सञ्चारमाध्यमले निर्वाह गरेको भूमिकाको सराहना गर्दै अहिलेको परिस्थितिमा पनि सोही किसिमको भूमिका निर्वाह गर्न आग्रह पनि गरेका छन् । चीनमा फैलदै गएको कोरोना भाइरसको प्रत्यक्ष प्रभाव नेपालको पर्यटन क्षेत्रमा पर्न जान्छ । नेपालको प्रमुख पर्यटकीय स्रोत बजार चीनबाट वार्षिकरूपमा झण्डै डेढदेखि दुई लाख पर्यटक आउने गरेका छन् ।

फुर्सदमा यो रमाइलो भिडियो पनि हेर्नुहोस्।

हाम्रो सन्देशमा प्रकाशित कुनैपनि लेख वा सामग्रीबारे गुनासो तथा सुझाव भए [email protected] मा पठाउनु सक्नुहुनेछ । हामीसँग तपाईं फेसबुक, ट्विटर र भाईबरमा पनि जोडिन सक्नुहुन्छ ।