डीएसपी कुमुद ढुंगेललाई पक्राउ गर्न अदालतको अनुमति

हाम्रो सन्देश संवाददाता

काठमाडौं, मंसिर १८ ।

अदालतले नेपाल प्रहरीका नायव उपरीक्षक (डीएसपी) कुमुद ढुंगेललाई पक्राउ गर्न अनुमति दिएको छ ।
महानगरीय प्रहरी परिसर काठमाडौंको निवेदनका आधारमा काठमाडौं जिल्ला अदालतले ढुंगेलविरुद्ध पक्राउ पूर्जी जारी गरेको हो ।

चोरी तथा लुटपाटमा संलग्न व्यक्तिसँग संलग्न रहेर आपराधिक गतिविधि गरेको भन्दै प्रहरी प्रधान कार्यालयले यसअघि नै निलम्वन गरिसकेको थियो ।

प्रहरीको अनुसन्धानका क्रममा गत चैत २६ गते काठमाडौंको रानीबारीमा भएको लुटपाटमा संलग्न भएको आरोपमा पक्राउ परेका विकास श्रेष्ठसँग डीएसपी ढुंगेलको फोन सम्पर्क भएको देखिएको थियो ।

प्रहरीसँगको बयानका क्रममा पक्राउ परेका श्रेष्ठले चोरी गरेको दिन आफूले डीएसपी ढुंगेलसँग भेटेको बताएका थिए ।
ढुंगेलले यसअघि पनि केही आपराधिक घटनाको अनुसन्धानलाई प्रभावित गर्न भूमिका खेलेको प्रहरी प्रधान कार्यालय स्रोतको भनाइ छ ।

कर्तव्य ज्यान, संगठीत अपराध लगायतको कसुरमा हाल जेलमा रहेका गुण्डा नाइके समीरमान बस्नेतसँग समेत डीएसपी ढुंगेलले पटक पटक सम्पर्क गरेका देखिएको प्रहरी स्रोतको भनाइ छ ।

तपाईको समाचार, लेख /रचना वा सुझाव र प्रतिक्रिया भएमा [email protected] मा पठाउनुहोला ।
Loading...