सागको सुटिङमा देशकै बेइज्जत– अरु देशको टोलीसँग मागेर बन्दुक चलाउँदै नेपाली खेलाडी

हाम्रो सन्देश संवाददाता

काठमाडौं, मंसिर १८ ।


१३ औं दक्षिण एसियाली खेलकुद (साग) मा सुटिङका खेलाडीले बन्दुक मागेर खेल्नु पर्ने बाध्यता छ । मंगलबारबाट सुरु भएको सुटिङका लागि नेपालसँग ‘गन’ नहुँदा खेलाडीले अन्य देशका खेलाडीसँग मागेर खेल्नु परेको हो
आज महिलातर्फ २५ मिटरको सेन्ट्रल फायर भयो । जसमा नेपालका खेलाडीहरुले पाहुना टोलीका खेलाडीहरुबाट बन्दुक मागेर काम चलाए ।

श्रीलंकाली खेलाडीसँग मागेको बन्दुक (बाकसमा) बोकेकी नेपाली खेलाडी
सेन्ट्रल फायरमा सहभागी एक नेपाली खेलाडीले श्रीलंकन खेलाडीसँग आजको खेलका लागि बन्दुक सापट मागेकी थिइन् । उक्त बन्दुक फिर्ता लिन श्रीलंकन खेलाडी ति नेपाली खेलाडीको पछि पछि आइरहेका थिए ।

घरमै आयोजना भएको खेलमा स्वर्ण जित्ने लक्ष्यसहित सुटिङ रेञ्जमा उपस्थित भएका नेपाली खेलाडीहरु आफ्नो लागि बन्दुक नआइदिँदा विदेशी खेलाडीसँग मागेर खेल्न बाध्य भए ।
तर, त्यसैमा पनि विदेशी खेलाडीका बन्दुक ‘कस्तो कन्डीसन’ मा छ भन्ने जानकारी नहुँदा पनि समस्या भएको खेल पछि एक खेलाडीले बताइन् ।

२० वर्ष पुरानो पेस्तोलको भरमा सागमा प्रतिस्पर्धा
सुटिङका लागि बन्दुक नहुँदा समस्या भइरहेको खेलाडी बताउँछन् । बन्दुक मात्रै होइन गोली पनि पुराना भइसकेका छन् । बन्दुक हान्नु पर्दा बिचैमा गोली बिग्रिने तथा जाम हुने गरेको खेलाडीहरु बताउँछन् ।

सुटिङ खेलाडी बदरुद्धीन अन्सारी सरकारले सुटिङमा प्रयोग हुने सामग्रीलाई पनि हतियारकै रुपमा सूचीकृत गरेका कारण यसको खरिद प्रक्रियामै ढिलाइ भएको बताए । खेल सामग्रीलाई पनि हातहतियार तथा खरखजाना ऐनअन्तर्गत समेटेका कारण नयाँ ‘गन’हरु खरिद नभएकाले सागमा पुरानो बन्दुक प्रयोग गर्न परेको बताए ।

‘खेल सामाग्रीलाई हात हतियारको रुपमा कानुनमा राख्दा समस्या भएको हो । साग हुन्छ भन्ने कुरा सबैलाई जानकारी नै थियो । तर, कसैले पनि समयमा बन्दुक ल्याउनेबारे चासो नदेखाउँदा समस्या भयो,’ अन्सारीले भने, ‘यसको तयारी शुरुमै गर्नु पर्ने थियो । गृह मन्त्रालय हो कि मन्त्रालयसँग समन्वय गर्नुपर्ने हो । तर, यस्तो नगर्दा समस्या भयो ।’

नेपाल सुटिङ संघले खेलाडीहरुलाई पटक–पटक नयाँ बन्दुक खरिदका लागि टेन्डर भइरहेकोदेखि ‘आज भोली आउँछ’ भनेर पनि झुक्याएको अन्सारीले बताए ।

तर, सुटिङ संघका अध्यक्ष पुष्पदास श्रेष्ठ भने उल्टै खेलाडीमाथि नै आरोप लगाउँछन् । खेलाडीहरुले राम्रो प्रदर्शन गर्न नसक्ने अवस्था आएपछि सबै दोष संघमाथि थोपार्न खोजेको उनको आरोप छ ।

‘अहिले खेलाडीहरु पराजित भएपछि विरोध गर्न थालेका छन् । यदि स्वर्ण जितेका हुन्थे भने यस्तो अवस्थामा पनि हामीले स्वर्ण जित्यौं भनेर भन्थे,’ श्रेष्ठले खबरहबसँग भने ।
सुटिङमा खेलाडीले भोगेको समस्याको कारण राष्ट्रिय खेलकुद परिषद (राखेप) पनि भएको संघका पदाधिकारीहरुको भनाइ छ । राखेपले खेल सामाग्री उपलब्ध गराउन नसक्दा यो अवस्था भोग्नु परेको सुटिङ संघको आरोप छ ।

खेल खेलाडीका लागि हुन्छ । तर, राखेपले खेलाडीका लागि भन्दा पनि पदाधीकारीका लागि गर्यो कि भन्ने प्रश्न यहाँनिर आएर ठोकिन्छ । सुटिङका सामाग्री समयमा ल्याउन नसक्दा नेपाली खेलाडीले मागेर चलाइरहेका छन् ।

नेपालसँग बन्दुक नभएका होइन् । तर, ती बन्दुक २० वर्ष पुराना छन् । सन् १९९९ मा ८ औं दक्षिण एसियाली खेलकुद (साग) अयोजना गर्दा खरिद गरिएका बन्दुकको भरमा अहिले पनि खेल्नुपर्ने बाध्यता छन् ।

‘अहिले हामीले चलाउने बन्दुक र पेस्तोलको गुणस्तर जाँच गर्ने हो भने कुनै पनि बन्दुक त्यसमा पास हुँदैनन्,’ सुटिङ खेलाडी अन्सारीले भने, ‘बन्दुकको सेलको आयु १० बर्षको हुन्छ । तर, हामीसँग दुई दशक पुराना छन् ।’

सुटिङका अध्यक्ष श्रेष्ठ भने अहिले नेपालसँग १० मिटरका लागि पेस्तोल पर्याप्त रहे पनि २५ र ५० मिटरका लागि बन्दुकको अभाव रहेको बताउँछन् ।

‘हामीसँग पेस्तोल पर्याप्त छन् । तर, २५ र ५० मिटरका लागि आवश्यक पर्ने बन्दुक हामीसँग नहुँदा समस्या छ,’ श्रेष्ठले भने, ‘हामीले सागका लागि सामग्री समयमै माग गरेकै हो । तर, उहाँहरुले सधै ल्याउँछौ मात्रै भन्नुभयो । अन्तिममा ल्याइदिनु भएन ।’

राखेपसँग २५ र ५० मिटरका लागि बन्दुक नभएको भन्दै उक्त क्याटेगोरीको खेल नखेल्ने विषयमा छलफल भएको पनि सुटिङ संघका अध्यक्ष श्रेष्ठ बताउँछन् । ‘हामीले यसमा पनि छलफल गरेका थियौं । तर, उहाँहरुले सामग्री ल्याउने जिम्मा हाम्रो हो तपाईहरु नडराउनुस् भनेपछि खेलाइएको हो,’ उनले भने ।
२५ मिटरको सुटिङ रेञ्जमा खेल चलिरहँदा छेउमै रहेकी एक अनुभवी खेलाडी भने निकै भावुक देखिइन् । उनले सागमा नेपालले स्वर्ण जित्ने सपना देखेकी थिइन् ।

तर, खेलाडीले खेल्ने सामाग्री समेत मागेर खेल्नु परेपछि उनी रेञ्जमै भावुक बनेकी थिइन् । ‘हामीले स्वर्ण जित्ने लक्ष्य लिएका थियौं । अहिले न ति गोली चल्छन्, नत आफ्नो सामग्री छन् ।’

तपाईको समाचार, लेख /रचना वा सुझाव र प्रतिक्रिया भएमा [email protected] मा पठाउनुहोला ।
Loading...