चुनावी सभालाई सम्बोधन गर्न प्रचण्ड आज हेलिकप्टर चढेर पोखरा, भक्तपुर र धरान पुग्ने

हाम्रो सन्देश संवाददाता

काठमाडौं,११ मंसिर ।

शनिबार हुने उपनिर्वाचनका लागि दलहरूले बुधबार चुनावी प्रचारलाई तीव्रता दिएका छन्।सत्तारूढ नेपाल कम्युनिष्ट पार्टीका अध्यक्ष पुष्पकमल दाहाल ‘प्रचण्ड’ ले आजै तीन वटा चुनावी सभालाई सम्बोधन गर्दैछन्।प्रचण्डले कास्की २, धरान र भक्तपुरका चुनावी सभालाई बुधबार सम्बोधन गर्ने कार्यक्रम तय भएको नेकपाले जनाएको छ।

स्रोतका अनुसार प्रचण्डले तीन ठाउँमा चुनावी प्रचार गर्न दिनभरिजसो हेलिकप्टर प्रयोग गर्ने भएका छन्। अहिले पोखरामा रहेका प्रचण्ड केहीबेरमा धरान उड्नेछन्। त्यसपछि उनी हेलिकप्टरबाटै काठमाडौं फर्केर भक्तपुरको चुनावी सभामा पुग्ने कार्यक्रम छ।

हेलिकप्टर चुनावी क्षेत्रमा भने नलैजाने उनको सचिवालयले जनाएको छ।पोखरा जाँदा प्रचण्ड हेलिकप्टरबाट विमानस्थलसम्म गएका छन्। उनी इटहरीमा हेलिकप्टर राखेर गाडीमा धरान जानेछन्। त्यहाँबाट त्रिभुवन विमानस्थल आएर उनी गाडी चढेर भक्तपुर जानेछन्।

यसअघि प्रधानमन्त्री केपी शर्मा ओली पनि आज पोखरामा चुनावी सभालाई सम्बोधन गर्न जाने तय भएको थियो। मंगलबार एक्कासी एपेन्डिसाइटिसको शल्यक्रिया गरेकाले प्रधानमन्त्रीको कार्यक्रम रद्द भएको छ।

धरानमा चुनावी सभा सकेर नेपाली कांग्रेसका सभापति शेरबहादुर देउवा काठमाडौं फर्कंदै छन्। देउवाको सचिवालयले दिएको जानकारी अनुसार विराटनगर विमानस्थलबाट काठमाडौंका लागि उडेका देउवा प्रधानमन्त्री केपी शर्मा ओलीलाई भेट्न जाँदैछन्।

समाजवादी पार्टी नेपालका संघीय परिषद अध्यक्ष बाबुराम भट्टराई चुनावी प्रचारका कार्यक्रममा भाग लिन दाङमा छन्। राष्ट्रिय जनता पार्टी, राप्रपा, राप्रपा संयुक्त, साझा पार्टी, विवेकशील नेपाली दललगायतले पनि उम्मेदवारी दिएका ठाउँमा चुनावी प्रचारलाई तीब्रता दिएका छन्।

निर्वाचन आयोगले बुधबार राति १२ बजेसम्म मात्रै चुनावी प्रचार गर्न पाइने कार्यतालिका यसअघि नै जारी गरिसकेको छ। बिहीबारदेखि मौन अवधि सुरू हुनेछ। चुनावी प्रचारका कार्यक्रमहरू गर्न पाइने छैन।

एक संघीय क्षेत्र, तीन प्रदेशसभा, धरान उपमहानगरलगायत रिक्त स्थानीय तहमा शनिबार मंसिर १४ गते उपनिर्वाचन हुँदैछ।

हाम्रो सन्देशमा प्रकाशित कुनैपनि लेख वा सामग्रीबारे गुनासो तथा सुझाव भए [email protected] मा पठाउनु सक्नुहुनेछ । हामीसँग तपाईं फेसबुक, ट्विटर र भाईबरमा पनि जोडिन सक्नुहुन्छ ।