मन्त्रीमण्डलबारे बामदेव गौतमको नयाँ खुलासा

हाम्रो सन्देश संवाददाता

काठमाडौं, २९ कार्तिक ।

प्रधानमन्त्री केपी शर्मा ओलीले मन्त्रीमण्डल पुनर्गठन गर्ने चर्चा व्यापक बनेको छ । तर यस विषयमा न त बालुवाटार नै बोलेको छ न त सत्तारुढ दल नेपाल कम्युनिष्ट पार्टी(नेकपा) नै । तर मन्त्रीमण्डल पुनर्गठन गर्ने विषयले सामाजिक सञ्जालदेखि मिडियाहरुमा समेत व्यापक स्थान र चर्चा पाइरहेको छ । यस्तो अवस्थामा नेकपाका एक प्रभावशाली नेता बामदेव गौतमले मन्त्रीमण्डल पुनर्गठनको विषयलाई पुष्टि गरेका छन् ।

गौतमले द नेपालटप डट कमसँग प्रधानमन्त्री ओलीले मन्त्रीमण्डल पुनर्गठन गर्न लागेको बताएका छन् । उनका अनुसार प्रधानमन्त्री ओली बाहेक अहिले भएका सबै मन्त्री हट्ने र नयाँ व्यक्ति आउनेछन् । प्रधानमन्त्री ओलीले आफूलाई एक–दुई जना मन्त्री परिवर्तन गर्ने नभई मन्त्रीमण्डल पुनर्गठन गर्ने बताएको भन्दै मन्त्रीहरुको राजीनामा होईन पुनर्गठन गर्न लागेको उनले जानकारी दिएका छन् ।

नेता गौतमले मन्त्रीमण्डल पुनर्गठन प्रधानमन्त्री ओलीको अधिकार भएको बताउँदै नेताहरुसँग आवश्यक परामर्श गरेर मन्त्रीमण्डल पुनर्गठन गर्ने उल्लेख गरे । मन्त्रीमण्डल पुनर्गठन हुने पुष्टि गरेका गौतमले मन्त्रीमण्डल पुनर्गठन हुने तिथिमिति चाहि खुलाएनन् ।

उनले भने– ‘यो बारे मलाई थाहा छैन । आवश्यक गृहकार्य गरेपछि प्रधानमन्त्रीले गर्नुहुन्छ । म यति चाहि भन्छु कि, मन्त्रीमण्डल पुनर्गठन हुन्छ । प्रधानमन्त्रीले मसँग पुनर्गठन हुन्छ, पुनर्गठनमा कसैसँग राजीनामा मागिदैन । भएकाहरु हट्छन्, नयाँ आउछन् भन्नुभएको छ । मैले जानेको यत्ति हो ।’

हाम्रो सन्देशमा प्रकाशित कुनैपनि लेख वा सामग्रीबारे गुनासो तथा सुझाव भए [email protected] मा पठाउनु सक्नुहुनेछ । हामीसँग तपाईं फेसबुक, ट्विटर र भाईबरमा पनि जोडिन सक्नुहुन्छ ।